પ્રાર્થનાસંઘ પરિચય

પ્રાર્થનાસંઘ - ભદ્ર આશ્રમના સ્થાપક પૂ. ભદ્ર સ્વામીએ ઋષિકેશના સ્વામી શિવાનંદજી પાસે ૧૯૫૦માં દીક્ષા ગ્રહણ કર્યા પછી, તેમના મનમાં સતત લક્ષ્યની શોધ ચાલુ હતી.

એ દરમ્યાન મહાત્મા ગાંધીજીનું નિધન થયું. પુર્વજીવનમાં તેઓ ગાંધીજી સાથે રહી ચૂક્યા હતા અને ગાંધી વિચારધારાથી પ્રભાવિત હતા. પૂ. મહાત્માજીના નિધન પ્રસંગે “નિત્ય પ્રાર્થના એ બાપુનું સર્વોત્તમ સ્મારક છે.” એવી પ્રબળ ભાવનાને અમલમાં મૂકવા અનાવલ શુકલેશ્વર ધામમાં નિવાસ કરી પ્રાર્થનાસંઘનો આરંભ કર્યો. પ્રાર્થનાસંઘની સ્થાપના વિ.સં. 2007-ઇ.સ. 1951 નૂતનવર્ષના દિને થઈ. એક વર્ષ અનાવલ રહ્યા પછી સર્વને અનુકૂળ એવા મધ્યસ્થ સ્થળ તરીકે સુરતની પસંદગી કરી. સ્વામીશ્રી સુરત આવ્યા અને ઉમરા–સોમનાથ મહાદેવમાં નિવાસ કર્યો. જ્ઞાનયજ્ઞ, પત્રિકા પ્રકાશન, યોગશિક્ષણ, અધ્યાત્મ અને સમાજ શિક્ષણ તથા માનવ કલ્યાણની ઉદાત્ત ભાવના સાથે પ્રાર્થનાસંઘ સંસ્થાનો પ્રચાર-પ્રસાર થવા લાગ્યો. આજે જે જગ્યા પર આશ્રમ આવેલ છે એ જગ્યા બૃહદ મુંબઈ સરકારે સ્વામીજીને અર્પણ કરી. વિ.સં. 2014 - ઇ.સ. 1958 થી સુરત હાલની જગ્યાએ પ્રાર્થનાસંઘ - ભદ્ર આશ્રમનો આરંભ થયો.

ગુરુદેવ સ્વામી શિવાનંદજીએ પૂ. ભદ્ર સ્વામીને પ્રાર્થના તેમજ યોગ-ધ્યાન જેવી જનકલ્યાણની ભદ્ર ભાવના સાથે પ્રવૃત્તિ કરવાનો આદેશ આપ્યો હતો. પૂ. ભદ્ર સ્વામીજીએ પ્રાર્થના પ્રવૃત્તિને પોતાના જીવનનું લક્ષ્ય બનાવ્યું અને પ્રાર્થના પ્રવૃત્તિ ઉપરાંત "પ્રાર્થના" નામના સામયિકનું પ્રકાશન કાર્ય શરૂ કર્યું.જે આજે પણ સંસ્થાની એક પ્રશસ્ય પ્રવૃત્તિ છે.